Siamo lieti di accogliere tra i
nostri collaboratori l’intelligenza satirica
di Roberto D’Ajello, procuratore aggiunto della Repubblica
’O povero guaglione
di Roberto D’Ajello
’O povero guaglione ha acciso ’a mamma
chiavannole uttantotto curtellate.
Stammoce accorte a nun ne fà nu dramma
cu ’a scusa c’ha scannato pure ’o pate.
’O puveriello è sulo nu criaturo...
diciassett’anne e unnece mise appena,
se sape, a chest’età nun è ammaturo.
È overo ca ’e duie muorte fanno pena,
ma po’, quanno l’he nchiuse int’ô
tauto,
ch’ato puo’ fà si tèrmena ’a partita?
Sulo a chi resta puo’ purtà n’aiuto
pe nun le ntussecà stu muorzo ’e vita.
Facite ampressa a giudecà ’e cristiane
senza sapé che teneno int’ô core,
cu qua’ cuscienzia v’azzuppate ’o ppane
dint’ê disgrazzie ’e chistu mio signore!
«Fa d’uopo scandagliare il suo vissuto
– dice, cunvinto, ’o miereco d’ ’e pazze
–
appurar ciò che ha dato e ciò che ha avuto,
si ha accucchiato panelle opure mazze».
Mettiteve int’ê panne ’e stu
suggetto:
a tre mise cadette d’ô siggione,
a quatto ’a mamma s’ ’o scippaie d’ô
pietto
pe nun s’arruvinà doie zizze bone.
A sette mise avette ’e riscenzielle
e a nove nu catarro brunchïale.
È accussì ca se guastano ’e ccervelle
e ’e perzone addeventano anurmale.
A dudece anne ’o pate ’o paccariaie
pecché cecato aveva n’uocchio â sora
e ’a mamma a quinnece anne l’alluccaie
doppo ch’êva scippato a na signora.
«Son proprio questi traumi in gioventù,
codeste incomprensioni familiari,
– ha ditto nu zi’ prevete â tivvù –
che scavano dei solchi senza pari
tra i genitori e il pargolo frustrato,
sicché se questi un giorno li fa fuori
non va punito, ma recuperato!
Mi fanno specie questi altrui furori!».
Nu giudice, ca sape ’a lecca e ’a
mecca,
e ha capito ’a psiche d’ ’o guaglione,
ha ditto c’ ’a galera nun ce azzecca,
che non è un deterrente la prigione:
«Ci vorrebbe una pena alternativa
che sia un percorso di maturazione».
«Na foca ncanna, a ll’aria ’e chi t’è
biva!»,
l’ha dato ncapa nu scustumatone.
S’è ditto ca nun s’è
pentuto ’e niente,
c’ha penzato sultanto a se scusà,
ch’è na carogna, ch’è nu ddio ’e
fetente,
ca sturia sulo ’o modo ’e s’ ’a scanzà.
Pe bona sciorta chiorme ’e guagliuncelle
le spedisceno lettere d’ammore.
S’ ’o vanno a visità dint’ê ccancelle
sinnache, deputate e senatore.
Pe furtuna a stu munno ce stà gente
ca nun se fa affuscà da ll’apparenza,
e sarria buono ca ’o ttenesse a mente
’o giudice c’ha dda caccià ’a sentenza.
Nun penzate a stu povero guaglione
che brutta vita farria arret’ê grate?
Nun pruvate nisciuna cumpassione
p’uno ch’è senza mamma e senza pate?
Napoli, Natale 2001
.......................................................................................................................................
’A rivolta d’
’a Prucura
di Roberto D’Ajello
Quatto aggiunte e sissanta sustitute
nu juorno se so’ fatto ’o paro e ’o sparo
e hanno deciso ca se so’ sfuttute:
«’O percurzo è nsagliuta, ’o passo è
amaro,
ma a Cordova ce l’ammo luvà a tuorno!
Stu disaggio ce ntosseca ’a jurnata,
è na lagna, nu piccio, nu taluorno,
nun se resiste: ha dda passà ’a nuttata!».
E accussì c’hanno miso mano â
penna,
se songo fatta na pruvvista ’e carta,
hanno spartuto ’a farina d’â vrenna
e ’e chesta hanno pigliato ’a meglia parta
pe mutivà ’o recurzo ô Ci Esse
Emme.
Nun saccio buono chello c’hanno scritto,
ma spiecano comm’è che ccà ’o Pi Emme
fatica sempe scunzulato e afflitto:
’o lavoro è fetente, ’e ccarte
assaje,
è na fetecchia ll’organizzazzione.
’E stu passo se fanno sulo guaje
e se scuntenta ’a popolazzione.
Naturalmente, primma ca ô Cunziglio
’o recurzo è arrivato a ’o giurnalista:
«Hanno raggione o è sulo nu puntiglio?
È giusto o è na cungiura cumunista?»,
descute ’a stampa, e ce s’azzuppa
’o ppane.
Ce stà pure chi ha miso ’e manifeste.
Ccà na pernacchia, llà nu vattemane,
tutt’ ’e ccapere se fanno maeste.
Cordova s’è appicciato ’o sigariello,
ha risposto cu ’o scritto e cu ’o pparlato,
e ttene mente a tutto stu vurdiello
comme si ’o fatto appartenesse a n’ato.
’O Ci Esse Emme trica e sturea ’e
ccarte,
ha sentuto nu cuofeno ’e perzone,
ma fino a mo nun ha pigliato parte,
nun sape ancora a chi ha dda rà raggione.
E ’a gente? ’A gente nun capisce niente:
legge ’e sta guerra ca ce stà nProcura,
nun sape chi so’ ’e buone e chi ’e fetiente,
capisce sulo ch’è na mprusatura.
Napoli, 7 marzo 2002
