Sirchia
’o schirchio
di Amedeo Messina
Sirchia ca schiane ’o stommaco ’e
chichierchia,
nun siente ’e squacquarià purzì ’e catarchie
p’ogne scrittuocchio ’e morte ca ncuperchia
pacchette ’e sigarette ’a fora ê marchie?
Vulisse ca chi fumma mo se nforchia
e de furacchio aspira c’ ’a naserchia
tutt’ ’o ttabbacco ca nisciuno sporchia
nè cu na legge e mmanco cu na serchia?
Se vere, oi ni’, ca te s’è
rrotta ’a chierchia
e tte funziona sulo ’a mana pirchia,
si apprimma faie pavà tassa superchia
e ’a coppa vaie scrivenno ’e vierze ’e Sirchia.
He fatto ’e ogne pacchetto nu sebburco,
cu dduie spataffie ca tu sulo surchie,
ma ognuno legge e ffumma cchiù ’e nu turco,
â faccia ’e ll’uocchie sicche r’ ’e
papurchie.
Rastellera
di Amedeo Messina
’O cavaliere, ca ianche ’e riente tene,
t’ ’e fà veré rerenno a tutt’
’o munno,
ntramente ogn’avvocato s’ ’o sustene
annanz’ô tribbunale a mmusso tunno.
Na mamma ca teneva nu criaturo
’e trivule se sconceca a ll’assequie,
quann’ecco ’a copp’ô ruppiopietto ascuro
se n’esce na resata senza requie.
Stu piezz’ ’e cavaliere rire sempe,
nun perde n’accasione, addó se trova,
t’apara ’a rastellera a tutt’ ’e tiempe,
’e ll’uommene sfranciuse è ’a meglia
prova.
Si po’ stu cavaliere se sceriasse
commilfó mole, spinule e murfiente,
i’ nce passasse ’a coppa. E chi parlasse?
Addora ’e pulezzato? He ritto niente!
Ma ’o fatto saie cher’è? C’arape
’a vocca
mustranno tutt’ ’e zzanne caruliate,
comme s’ausa si nn’è bbona ’a chiocca
o tra zampruosche, ciuote o scustumate.
Miettece, po, che ddint’ô rientefricio
ce stà n’estratto ’urina ’e iatta ’e
razza
pe mbruscenà ’e ggengive a mmeglio afficio
e ssaie ca, cchiù ghianco è, cchiù c’è
pisciazza.
......................................................................................................................................
Acqua d’austo
di Amedeo Messina
Cu cchesta “estate a Nnapule” fa festa
tutt’ ’a città ggià lesta a gghì
a ttiatro,
a ssèntere ’e ccanzone e a ccagnà vesta
ntramente d’ ’a miseria è ’o suoccio
quatro.
S’allecca ’e ddete sulo ’o mast’Austino
ca ncopp’ô municipio è n’assessore
e mmette a ddestra ’a pizza e ’o mandulino
facenno d’ ’a sinistra ’arriffatore.
Mo direttrice artistica ’e ll’evento
ha nummenato ’a figlia soia subbretta
ca ll’arte piglia comm’a trattamento
pe cchella nnuressìa ca ll’arricetta.
Nun pò cchiù ’e chesto n’ommo
stà felice,
pecché cu nu sul’atto ha sistimato
na figlia ca nun scammara n’alice
e ’o pisemo d’ ’o stommaco ’e nu pato.
Cicerchie e ffave a ttavula s’è miso,
quatto bbutteglie ’e vino nuovo acito,
dduie ette ’e ficusecche scarze ’e piso
e cciento gramme ’e sguizzero ammarcito.
Chi sa, vuie furastiere, che ppenzate?
Ca ll’ommo a ll’accasione è mmalandrino?
Ma sulo chesto a Nnapule è st’estate:
chiove acqua d’austo a mmast’Austino.
