'o pernacchio
a cura di Alfonso Cirillo

Nu piezzo cu nu scippetiello ’e firma f.l. ncopp’ô Curriere r’’o Miezoiuorno r’’o 16 maggio 2004 ce rà nutizzia ch’è mmorta ’e subbeto ’A mmasciata, ’o periodico criato ’a Massimiliano Canzanella. Ll’esequie se so’ fatte cu na cunferenza stampa int’â saletta verde r’’a libbraria ’e Geppino Guida ô Vommero a via Merliani. P’’a verità me song’avuto ’a sceruppà int’â vita mia paricchie strunze vive c’alleverisco vulantiere chille ca so’ mmuorte. Ma nun avennome mmitato aggio fatto ’o caso a ppenzà ca chi more è bbuono stiso e chi campa ’o ttene ntiso.
Pe chistu mutivo lloco nun mancammo maie ’e rispetto annanz’ê muorte ma, salute a nnuie, si a nzerrà ll’uocchie è nu giurnale, nun me pare ca s’êsse avut’’a fà tutto stu trivulo vattuto. Ntenniteme a ciammiello. Aggio piacere quanno arapeno ’e giurnale nuove e me piglio collera si chiureno, pe bbia ca tutte quante avessero ’a parlà c’’a vocia lloro, ma sta vota sti luotene afflittive nun ce azzeccano pe nniente e subbeto ve metto ’e ccose nchiaro.
Mprìmmese: ’A mmasciata asceva cu ddoie dezzione, una ’e carta e n’ata virtuale. Ha chiuso chella mpetenata, ma suspira ancora chella ncurzo dint’â rezza. Embè? Chiste che ghievano truvanno? Vulevano avé voce a ttutte pizze? Libbera è ’a voce pecché libbero è ’o mercato. Cu cchi s’’a ponno maie piglià, si vennevano p’ogne nummero sì e no na cinquantina ’e copie? Se vere ch’era na sfurnata ’e rrobba ’e scarto. Nu scartiloffio. Comme se rice? Putecaro senz’accunte, sulo ’e pimmece fa ’e cunte.
Nziconna: si uno tene dduie cavalle e vvò arrivà addó ha dda ì, si ’o primmo è acciuppecato corre c’’o siconno. O no? Ma ’e summiere ’e ll’Accademmia, nun putenno cchiù arraglià ncopp’ô giurnale, se so’ mise a ffà chello c’hanno sempe fatto int’a stu mese, tant’è ca comme vuie sapite ’e ciucce a Nnapule se chiammano pure ’e musicante ’e maggio. Accussì t’hanno ntunato a mmodo lloro n’arragliata chiagnazzara, manco si fosse morta ’a lengua nosta o ’a libbertà r’’a stampa e dd’’o penziero.
E ppo’, cher’è? ’A succurzale elettronica ’un funziona? Pare ca no. Pure ncopp’ô sito lloro è sciso nu selenzio, nu scurore, tant’è overo ca nun ce se trova manco ’a nutizzia stessa ’e chesta cunferenza, nè r’’a nzerrata r’’o giurnale. Comme si fosse muorto nu parente r’’o qua’ se mettono assaie scuorno. O hanno pututo crerere a na specie ’e malatia francesa ca mpestava pure ’o sitariello. Chello ch’è certo è ca nun ce se trova manco na parola ’e connoglianza, na striscia nera ’e lutto o na vrenzola ’e dulore.
Quaccheruno m’è venuto a ddicere ca forze s’è trattato ’e na forma ’e degnetà, ’e nu selenzio ’e cummenienza o ’e nu rispetto riguarduso. Ma vulite pazzià o vv’’o crerite overamente? Ma vuie ll’avite ntiso bbuono ’o sbucetià r’’o Canzanella? Ato che taluorno ’e funnerale! Mo v’’a cont’io ’a cronaca ’e ll’esequia. Ato che diasilla p’’a bonanema ’e ’A mmasciata! Chillo t’ha miso na libbraria a revuoto e, mmece ’e fà ll’eloggio ’e chi ll’è mmuorto, ha dichiarato guerra a chi, dice isso, ll’ha luvato ’a copp’ô munno.
Apprimma se l’è pigliata cu Ermanno Corsi e Renato De Falco, pe bbia c’avarriano avuto ’a stà assettate â presidenza nzieme cu isso e Gordon Poole e mmece nun se so’ fatte manco abberé, isso rice, pecché ’o primmo, cu ttutto ch’è presidente ’e ll’ordene r’’e giurnaliste, nun se ne mporta assaie si more nu giurnale, e ’o siconno penza sulo ’e libbre suie e nno ô nnapulitano. Ma si sti ccose Canzanella ggià ’e ssapeva, pe qqua’ mutivo ll’ha mmitate? Dicimmo ’a verità. S’è arresentuto e mmo ’e ttene a ttutt’e dduie ncurrivo.
Appriesso ’o “criatore” s’è abbiato a prutestà ca so’ mancate ’e ssuvvenzione ’e pubbreco renaro. Aliasse ’e sorde ’e tutte quante nuie. E ccà se l’e pigliato cu ’e stituzzione (liegge: ente lucale) pe bbia ca nun ce hanno miso na supponta, e forze sarria ’o caso ’e ricere supposta. Ma comme? Uno c’ha criato nu giurnale va truvanno po’ r’’o fà campà cu ’e sorde r’’o Cumune o r’’a Reggione? Era forze n’opera ’e nteresse gennerale? N’attività ’e curtura o ’e scienzia? Nzomma ’o “criatore” se n’è gghiuto ’e capa. Se trattava ô cchiù ô cchiù ’e na mpresa perzunale, accussì comme tutta perzunale è ’a lengua r’’A mmasciata.
Ave voglia chi stà areto â firma ’e f.l. ’e scrivere ch’è mmuorto nu «giornale grazioso»! A pparte ’o fatto ca nun capisco ’e qua’ grazzia va parlanno, nun me pare ca nu giurnale pò essere grazziuso e basta. Tenarrà pure quaccosa ’a ricere e se giudeca pe cchesto, pe ccomme ’o ddice e a qqua’ ggente ’o nnerizza. Ave voglia Canzanella ’e s’ha piglià, comme scrive ’o piezzo, cu «la scarza attività degli intellettuali napoletani»! E c’avessero avuto ’a fà, ’a fora ’e chello ca ggià fanno? Na culletta p’’o fà stà bbuono? Na curona ’e sciure mo ch’è mmuorto?
Ll’articulo ce nforma ca siconno Canzanella hanno lassato murì ’A mmasciata pe bbia ch’era nu giurnale «scomodo», e sapite vuie ’o ppecché? Rappresentava nientemeno na menaccia ntiempe ’e devoluzzione... Nzomma na specie r’attentato a ll’unità ’e ll’Italia. E tutto chesto è stato ritto cu nu «buffo quanto desueto napoletano forbito». Avite ntiso che bbellu spireto ’e patana sanno fà ncopp’ô Curriere? Sarrà pure stuiato ’o nnapulitano ’e Canzanella, comme vuie sapite se stregliano ’e summiere, ma te l’hanno nnaurato bbello ’o pinnolo, scrivenno “buffo” ô posto ’e streuzo e “desueto” mmece ’e ca nun s’ausa.
Nzomma, qua’ sorde e qqua’ menaccia? Quali stituzzione e qquali ntellettuale? E ssì! Mo ce mancava sulo nu “criatore” a ffà pur’isso na retologgìa e a bberé a ttutte pizze na cungiura! ’A verità è una sola. Ccà nn’è mmuorto niente ca nun fosse na dimustrazzione ’e ciucciaria canzanellesca. Na gnuranza stravestuta a llengua napulitana, comme maie s’è pututo sentere e nisciuno aveva maie liggiuto o scritto. Ll’avevo ritto ggià, v’arricurdate? Fermate a cchisto, ca pò ffà sulo rammaggio! Embè! S’è perzo nu giurnale, ma nun s’è scanzata ’a lengua.
Rummane ancora ’o sito a spannere ’a culata ’e chistu scuorno ca ce vene ’e faccia. Ne vulisseve n’assaggio pe pruvà? E gghiateve a leggere che t’hanno cumbinato a cchillu puveriello ’e Gordon Poole, iusto p’’o ringrazzià ca s’è pigliato ’o ncommeto ’e purtà ’a presenzia soia mmiez’a sti summiere arragliature. Scrivenno ddiece righe, comm’ô ssoleto cu ttutte ll’aferese sbagliate, na certa Marta Credenza v’’o presenta ncopp’ô sito lloro comm’a uno ca «nascette [sic!] ’o 1934» a Boston e ch’isso «se toccarrà [sic!] ’e nierve» pecché nun sape scrivere ’o nnapulitano!
Sciù p’’a faccia ’e cuorno r’’a Credenza! Le se ponno scugnà ’e ppigne nfronte! ’O prufessore se pò ppure cunzulà... Ammacaro sape scrivere ll’angrese e ll’italiano. ’A Credenza, mmece, nun sape manco parlà comme ll’ha fatta ’a mamma. E leggite ’o riesto. ’E diece righe servono a nfurmà ca Gordon Poole ha «traduciuto [sic!!!]» r’ô nnapulitano «a l’angrese [sic!]» na puisia ’e Rafele Viviani. Chest’è na bbona cosa e lle facimmo ’e cumplimente, ma teniteve ncopp’â seggia! Ha rato nnanteprimma «na trastula [sic!!!] ’e ll’opera» a ’A mmasciata.
Avite liggiuto bbuono? Stévamo scarze a trastulante! Mo è gghiuto a ffernì pure ’o Poole mmiez’ê ciucce! Vuie penzate ca se tuccarrà overo ’a nervatura? I’ crero ca siccomme è gruosso ’ammore suio pe Nnapule e ccanosce bbuono ’a cultura soia, sia p’’o “nascette” ca pe ll’accusa ’e bbàito, se sarrà tuccato ggià quacc’ata cosa. Nuie le facimmo ’e cchiù carnale aurie nuoste, nzieme c’’a speranza che scegliesse meglio amice e ccunferenze. Specialmente si ’a campana sona a mmuorto.