'o pernacchio
a cura di Alfonso Cirillo

7 gennaio 2004

Ll’azzeccuso putecaro

Corre p’ ’a rezza ’o sito ’e n’accademmia ca nun piglia nomme nè r’â scena buscareccia cunzacrata a ll’aroie Accademmo, nè r’â scola r’ ’o felosofo Platone, nè r’ô ciardino aumbruso ’e Cicerone a Tùsculo e nemmanco ’a chillo ca se rà p’ ’o ssòlito a na chiorma ’e ggente ca s’aunisce pe sturià quaccosa e sfucunià na scienzia rint’ô campo r’ ’a cultura. Duie anne fa Massimiliano Canzanella è gghiuto add’ ’o nutaro e ddint’a na vutata r’uocchie s’è mmentato ll’accademmia napulitana comme si nuie stessemo a bbacante ’e zarzuele e guattarelle. Stà tutto scritto, tutto lìceto e sprìceto ncopp’ô strumiento. Libbertà e democrazzia cumportano ca pure nu cetrulo nzuccarato passa pe babbà e assaie spisso chi mpapocchia è pasticciere.
I’ penzo, mmece, ca stu nomme r’accademmia è asciuto fora pe bbia r’ ’a ggente muzzecutola e spuntuta che te fa nu trafiggerio cu ’e sustuse chiuove r’ ’e scuntrufole r’ ’a lengua e dd’ ’o penziero. Comme vuie sapite, nfatte, Accademmo fuie p’ ’e Grieche nomme propio ca signifecava “popolo mpizzato”, e chi vulite ca se mpizza meglio ’e ll’ate si no chi se chiamma Canzanella, aliasse chi ave ’o canzo ’e cumparì male canzato? Arricurdàteve c’ ’o nomme ’e Canzanella vene pur’isso r’ô ggrieco kampto, che vò ricere avutà, chieià, sturzellà, trammià e, si pe ghionta ce mettimmo ca Massimiliano vene r’ ’o llatino a ddicere ’o cchiù zzico mmiez’ê gruosse, allora ce putimmo fà capace ’e comm’è ghiuto ’o fatto.
Chello ca nun se capisce è ’o senzo gennerale ’e chesta mpresa. Qua’ ruolo putarrà maie assorvere n’accademmia senz’accademmece? Sapimmo ’e chillu ggenio che diceva r’essere “accademmeco senz’accademmia”, ma ’a recipreca nun vale. E ncopp’a ttutto conta meno ’e niente. Nisciuno nfino’a mmo ce nforma a qqua’ cultura fa referimento. Nun se ne pò lleggere ’o prugramma. Nè chi songo ’e soce strulacune. Nun se ne saparrà nu poco ’e cchiù ienno a vveré ’o ggiurnale lloro o vesitanno ’o sito, si nun fosse c’accussì se leva ’a coppola ô zelluso e nuie appurammo che nun sanno manco chello ca prumette stesso ’a nzegna lloro. Tutte sanno, nfatte, c’ammasciata vene a ddicere nfurmà pe ncarreco ’e quaccuno, ma llà ddinto nun c’è signo nè ’e chi ha dato sta ncumbenza, nè se pò lleggere na scarda ’e nfrummazzione.
Sì, è overo, hanno piazzato n’azzeccuso int’a ddiece o unnece puteche, pe fà veré ca pe Nnapule se parlano ddoie lengue. ’A napulitana e cchella nazziunale. A ll’anema r’ ’a scuperta ’e ll’acqua cavera! ’A mmasciata è nnova assaie e ’a putevano mannà a ddicere sulamente n’assessore castellese, ca ’o nnapulitano nun ’o ppò ssapé, e ’o presidente presentuso ’e ll’accademmia ca nun ’o ssape. E cchesto è addemustrato ’a ll’azzeccuso stesso, addó truvammo scritto ca «bilenguismo armonico è na campagna promuvuta da l’Accademia Napulitana». Stu spremmiento avesse ’a essere n’esempio ’e comm’a Nnapule se parlano ddoie lengue! Nce accapezzate vuie si è italiano o napulitano? Na lengua gneneta ’a ruie pate? N’ircuciervo figlio ’e ruppie anarfabbete?
’A prupusezzione vò essere napulitana ma, subbeto roppo a nu “bilenguismo” ca putarria pur’ì bbuono, nuie leggimmo “armonico” ch’è ttermene tuscano, pecché a Nnapule s’è sempe ritto armoneco o armuniuso. Appriesso c’esce na “campagna” ch’è na nuvità si nun se tratta ’e rrobba terrazzana, comme testemmonia ’o nomme stesso d’ ’a reggione nosta. Mmece, c’ ’o senzo ca na guerra se cummatte a ccampo apierto, ccà nisciuno l’ha maie ritto. Nè se capisce pecché mettere azzeccuse pe na città avesse ’a essere na guerra, nu cummattemiento, n’acciretorio, nu scenufleggio. E na vattaglia addechiarata ’a chi? R’ô guarracino Canzanella annammurato r’ ’a sardella? Ma pecché, stevamo scarze a bbotte e bbomme? Si propio s’ha dda regnere Napule ’e cartielle pe sta lengua nosta, nun sarria assaie meglio r’ ’o gghì facenno cu pparole ’e pace?
Cuntinuanno a lleggere truvammo “promovuta”. Ve l’arraccumanno! Chist’è nu sciucquaglio overo ’e ll’accademmia, e nun v’ ’o putite perdere trasenno pe ffà spese int’ê pputeche. State annanz’a nu bisciù r’ ’o lesseco accademmeco e ve pare niente? Arapite bbuono ll’uocchie e rummanitece abbagliate! Nuie ate, ca simmo napulitane verace, avarriamo scritto ‘abbiata’, ‘prumuvuta’ o, pe gghì ô mmuderno, ce ne sarriamo asciute cu ‘prumossa’. Ma nun ce stà nient’ ’a fà, accarammescamente è stabbelito “promuvuta”, forze pecché “promuvuto” sarrà stato ’o canziato Canzanella spessianno va sapenno quala scola cavaiola. E nun ve conto appriesso chillu “da l’” che nun s’ausa cchiù ’a ruie siecule e “Accademia” che stà scritto ntuscanese. E cchest’è ’a fine ch’eva ’a fà ’o nnapulitano? ’A lengua nosta tene a defenzure ’e gguardie sguizzere ca parlano miscioscio.
Neh! Ma pò maie essere c’avimmo fà chesti ffiure ’e mmerda cu nnuie stesse e nfaccia a ttutte ’e furastiere? Vuie capite ca nun ce l’aggio cierto cu Massimiliano Canzanella. Ntiempe ’e libbero mercato ognuno venne chello c’ha cugliuto. E però è pur’overo ca chi accatta s’avarria ’abbedé si è rrobba bbona o pezzuttata. Nun è fora r’ ’a legge ’a gnuranza r’ ’o nnapulitano, ma ll’avarria ’a essere ’o gnurante ca ne va facenno scola p’ ’e guagliune e mmette sti cartielle int’ê vetrine. Chi affuffa ’a bbona fede ’e n’assessore r’ ’o Cumune ’e Napule e d’ ’o presidente ’e ll’Ascom-Confcommercio r’ ’a stessa città e ffà passà pe nnapulitano ’a lengua ’e si’ nisciuno è ancora ntrepeto mmentore c’ ’a fantasia r’ ’e scartiloffie? Sta lengua mbastarduta pò mmaie essere viglietto ’e viseta cu ttanto ’e stemme r’ ’a città partenupea e dd’ ’e cummerciante uneste suoie?
Siccomme nuie mettimmo ’o naso p’ogne ppizzo vulevemo assapé che ce faceva chillu masto ’e preffezzione ch’è Renato De Falco quanno ha presentato ’a primma asciuta ’e ll’azzeccuso putecaro. Neh, avvocà! E addó è fernuta ’a scienzia vosta annanz’a cchistu capodopera accademmeco ’e roie lengue? Sapimmo bbuono c’aggarbato comme site nun scanzate maie tutto chello ca se pò ffà pe Nnapule e p’ ’a lengua soia, ma nun ve site addunato ca chist’era nu male fuosso? No. E, traseticce comme simmo, ammo pure saputo c’ ’o mutivo è ca nun ce veriveve tantu bbuono, pe bbia ca ve site ggià duvuto operà ddoie vote a ll’uocchie. Perdunate ’o mpaccio nuosto e ausatece ’a crianza ’e favurì ll’agurie ’e mprufecà p’ati ccient’anne.