Nisciuno se n’è
accuorto. Si po’ se n’è addunato quaccheruno,
chisto cierto s’è appilato ’a vocca e
ntesecuto ’a mana. Nun abbastava che ccartielle, manifeste,
nzegne, mure e maglietelle menassero allucche tuorno tuorno
pe na lengua ca nun tene scola e vene scritta sciué-sciué
facenno sgarre o piglianno zzarre! Mo nce se so’ mise
pure ’e scamazzataste sguancellate ca te vonno sfunnacà
na lenguriata anarfabbetica e trellegna pe nnapulitano overo.
S’assettano annant’ô computerro e dd’
’a chiantuta lengua nosta fanno nu micirio e pruditorio
ca te schiaffano prive ’e scuorno ncopp’ê
site rint’â rezza nternazzionale. Ccà
s’è mbriacata ’a vusciola, s’è
perza ogne crianza e ’o nnapulitano è addeventato
na pazziella mman’ê ccriature.
Nun voglio cierto annià ’o deritto a pputé
scrivere e pparlà comme ce pare e ppiace, ma quanno
po’ se passa a na pretesa ’e se fa masto ’e
grammateca, sintasse e ortografia, e pe gghionta ’e
ruotolo se vò nzignà ’a letteratura,
i’ penzo ca nce s’ha dda mettere ammacaro ’o
ppoco ’e chiummo e nu cumpasso. Bbuono ’o ssaccio
ca ’o nnapulitano faglia ’e nurmativa, ma no
pe cchesto è privo ’e regule e mmesure. Bastarria
mparà comm’hanno scritto ’a lengua nosta
chille ca ne portano ’a bannera, avennola annurata
e annubbeluta iuorno pe ghiuorno, pe puté scrivere
’e pparole ca ce passano p’ ’a capa.
Ma ncopp’a ttutto, chello ca nun se supporta, è
ll’assuluta assenzia ’e nu cuncierto perzunale,
cunfruntanno ’e stesse scrittuocchie ’e ognuno
’e lloro. Te cagnano manera ’e mettere ’o
nniro ncopp’ô ghianco nfin’a na parola
sola. Nun se capisce cchiù ll’articulo, nu
nomme, e nun parlammo po r’ ’e verbe ca me pareno
na guerra addechiarata a ogne lettore. Stammo mmiez’a
n’appicceco ’e sbariune. Annant’a na guainella
r’ircucierve. Ce arrevacano pe ccuollo na trubbea
’e rancefellune. E quanno ce va bbona t’ ’e
ssiente mparuliarse lloro stisse. Chi s’affanna p’
’e capì nun spicceca e accapezza, ma c’esce
pazzo o se scapizza.
’O bbello è ca se crerono tuture ’e Napule,
patriote ’e chi sa qua’ lengua, defenniente
’e va truvanno qua’ cultura. E ’o cchiù
bbello ancora è ca ce stà chi ’e ddà
pure aurienza. Seie sturiuse vicchiarielle s’ ’e
pigliano ncrerenza, senza manco tené ’o tiempo
’e lèggere chello ca cumbinano, e lle scrivono
ddoie reghe ’e cumprimente. N’assessore ’e
spunzurizza. Na sinnaca fa nfenta ’e scrivere na lettera
p’ ’o spasso r’ ’e ccriature. E
appriess’a lloro ’a prucessione ’e tutte
chilli llà che nun sapenno tené mmano ’a
penna nazzionale penzano ’e passà p’allitterate
ausanno ’a lengua r’ ’o tatillo e dd’
’o vavone. Comme si fosse naturale e ’un ce
vulesse, mmece, sturio e apprecazzione.
Mbona fede ’a maggiuranza, e cuficchianno cierte ’e
lloro, ’e bbire ca se ranno a che ffà cu nu
cuofano ’e abbiate ’e nunnature, arcucce ’e
scartapelle, assagge ’e cose strutte e, crerenno ’e
mettere ’a lengua int’ô ppulito, ntonano
nu requie e schiatta mpace e ’a nuie vonno pure nu
cunzuolo. Penzano ncap’a lloro ca c’ ’o
nnapulitano se po ffà, comme c’ ’a sarma
’e Lazzaro, nu sùsete e cammina, ma chello
che ne vene fora è nu golemme ’e lota senza
sciato. Ncopp’a sti taluorne ’e faveze allicuorde,
a sti luotene afflittive ca s’aizano r’ê
site, a st’attentate quotidiane contr’ô
patremmonio nuosto ca ce fa napulitane s’ha dda puté
quaccosa.
Nuie ce mettimmo ’o spazzio e ’o tiempo, arapenno
na rubbrica che vò sgamà sti piripicchie e
piripacchie ch’int’ê site fanno ’e
nguacchie. E ’a vattiammo “nureche ’e
rezza”, pe bbia ca dint’ô spazzio virtuale
chiste ’astregneno cu ttanta nureche, aliasse nchippe
o links, che songo mpicchie e mpacchie pe ll’affritta
lengua ’e Napule, accussì ca t’ ’a
sguanceano, t’ ’a sturceano e le fanno nu strascino
ca me pare staraciata. Po’ le mettono nu nurecheo
ncanna e mpenneno parole aret’ê qquale chi tene
’e rrecchie bbone sente ancora ’a voce ’e
chi p’ ’e viche e mmiez’ê cchiazze
pe ssiecule ha campato mmentannose na vita ’e sentimiente,
dignità, fatica e libbertà pe tutte quante.
