’O
’i’ ccanne a vvuie. Scemulillo è
turnato e, come disse il poeta:
Grazzie
p’ ’a bellissima accuglienza,
che doppo na longa assenzia,
a ’o cumparì ’e chesta mia
presenzia,
vuie v’avutate ’e renza
facennome abberé ’a circonferenza!
Ma i fatti
sono gravi, anzi gravissimi assai, e il sottoscritto,
per quanto con intenzioni cincinnatesche e sottrattive
ha dda piglià pusizzione ncopp’ê
cuntinue nciarme cui la realtà romanzesca
sottopone ll’anema r’ ’a mia accupputa,
forse ammappuciata. Nun saccio... Facite vuie, ma
facite bbuono ’o caso a ppenzà.
’O fatto è chisto.
Me ne scennevo cuoncio cuoncio p’ ’a
scesa, scuscesa, scunnessa, sciuliosa, ca r’
’o Corso mena deritto abbascio Tuledo, detta
Magnacavallo (accereva ’e ppovere bestie?)
aliasse r’ ’o spitale militare, quanno
la mia stanca pupella ’e ll’uocchie
vene sbiata ’a quacche cosa ca me pare overamente
for’assietto.
E sissignore, è overo ca p’ ’e
vvie ’e sta città r’ ’a
nosta nce se trova uno ’e tutto: sfrantumme
’e machine, fierre vecchie ’e muturine,
bonaneme ’e lavatrice e frigurifere, munnezza
ammuntunata, mubbiglia ca te ce può renchiere
na casa cu tenielle, cummò, tazze p’
’o cesso, matarazze, etceveza etceveza.
Ma nuie cu chesti scartapelle oramaie nce avimmo
fatto ’o callo. Ce cummivimmo. È ’o
paisaggio nuosto ’e tutte ’e iuorne
e nce arrangiammo p’ ’a campata. Na
città lustra e pinta comm’ ’a
Svizzera? Arrassusia! Rrobba ’e n’atu
munno ca ce pò luvà ’a salute
’a cuollo. Chist’è ll’ambiente
nuosto. Nce avimmo miso tenna ’a sècule
e mmo, cher’è, nu se rispetta cchiù
ll’ecologgìa?
E ppo’, si vulimmo parlà, a nnuie tutta
sta mazzamma nun ce rà nisciuno mpiccio.
Abbasta che scanzammo ’o ntrùppeco,
che scennimmo r’ô marciappiere addó
’un se ponno certo avanzà pretese ’e
ce stà commete, che scartammo ’e machine
assassine, che ce mparammo a ffà ancarella
cu tutte ’e muturine, è ’o iuoco
è bbello e fatto.
Comme ricite? Ah sì, avite pròpeto
raggione. È overo. Ogni tanto quaccheruno
nce more acciso... Ma pure a cchesto nc’è
remmedio. Ce stammo attrazzanno a nun ciampecà
int’ê muorte e, crerite a mmé,
nun passarà assaie tiempo e nun ce faciarrimmo
cchiù nemmanco caso. E ppò... ricìteme
na cosa. Ma nun ve fa piacere si nuie stammo tutt’
’e iuorne int’â televisione?
Ricimmo ’a verità! ’A classe
nun è acqua e a cchistu campiunato nuie vincimmo
sempe. Modestamente, nun vulimmo essere siconne
a nisciuno. Sì, sì, aggio ntiso. Baghdàd
mo sta a ’o primmo posto... E quanto pò
durà? Sentite a mmé, ca nun appena
se ne vanno âmericane llà nn’accireno
cchiù manco a na mosca. Ma vulite pazzià?
Cu tutto ’o petrolio ca teneno, che s’avarriano
accirere a ffà? Mmece simmo nuie, ca nun
putenno cuntà sorde, ce cuntammo ’e
muorte accise.
Ué! M’avite fatto perdere ’o
filo... Addó stevo? Ah, sì. Nzomma,
ntramente sfuievo r’â munnezza a destra,
me so’ truvato a mmana smerza annanze a nu
spettaculo ca manco nu napulitano scuzzunato comm’a
mmé s’ ’o pputeva sentì
’e scennere. Ma pecché, vuie v’
’o pputiveve maie crérere ’e
truvà annanz’a ll’uocchie vuoste
nientemeno ca na tavula p’ ’o surf?
E pe ghionta ’e ruotolo, ncignata propio no,
ma quase nova.
E allora me so’ dditto: ccà ’o
fatto è pusitivo e s’ammereta rispetto
e ’a massima attenzione. Annanze a stu lasseto
curiuso aggio penzato ca na spiegazzione ce ha dda
stà e nce ne putimmo fà capace. Tutt’
’a colpa è d’ ’a televisione.
Pe ghiuorne e ghiuorne ce ha fatto nu luoteno afflittivo
cu ll’immaggene o ’e nutizie r’
’o tuzzàme, r’ ’o stuzzone,
r’ ’o zzuname o comme zunnazzunne se
chiamma isso.
Nu guaglione se sarrà sentuto ’e squaglià
’o sango ncuorpo è sùbbeto ha
penzato: ma quala onna e onna? Ccà se pazzea
a ffà male! Susimmoce sta tavula e mettimmo
’e piere nterra. Quanno vene ’a staggione?
Ma fossemo asciute pazze? Me ne vaco abbascio Pusilleco,
me piglio na bella seggia a stennetora e me ne sto’
spaparanzato sott’a nu mbrellone. Sciù!
P’ ’a faccia ’e chi fa ’e
sorde c’ ’o turismo ’e soreta
a Puckèt e a Vatecock!
Signori i fatti sono questi, e la foto da me scattata
li documenta. Ce mancava sulo stu zzuname pe rinforzo
r’ ’a saggezza antica: ’o mare
è bbello si t’ ’o vire ’a
terra, e ’a copp’ ’e scoglie se
pigliano cozze e telline. ’O mare... ’O
ssaie cher’è? Na cartulina. T’
’a ggire annanze e areto e ce può pure
summuzzà c’ ’a fantasia. No.
Napule nun è na California. Ma qua’
ggente ’e mare? Nuie simmo na genimma ’e
parulane.
Chillo ’o guaglione ha pigliato ’a tavula
e, stanno a ssentì ’a mamma e ’a
fidanzata soia, s’è fatta n’anema
e ccuraggio, appuiànnola comme fosse na libbarda
misa ’e travierzo mmiez’ê cassunette.
Capite? ’O surf mo sta llà nzurfato,
addó ll’avesse avuto appennere pe vuto,
p’avé zumpato ’o malo fuosso
r’ ’o zzuname. Chiste sì ca songo
avvise ê mieze marenare. Un monito di storia
e di cultura per i posteri. E io non posso che sottoscrivere
e mi firmo:
il vostro affezionato Scemulillo
