Vott’a chiovere

Se fa ampressa a dicere ca chiove. Abbasta ca r’’o cielo scenneno ’e ggocce d’acqua e ognuno, senza sbatterse chiù ’e tanto, pò sentenzià ca sta chiuvenno.
Ma spiecà comme e ’e che manera sta chiuvenno, già ’a cosa se fa nu poco chiù difficultosa. ’E vvote, pe pittà pricisamente ’o “fenomeno atmosferico”, nun abbastano nu cuofano ’e parole. Spiecà quant’acqua scenne â cielo, (n’antecchia, n’alliccatura o nu subbisso), e pe quantu tiempo chesta scenne, (pe n’ora o nu minuto), già se va rint’ ’e chiavette. Pecché propio comme cagnano ’sti ddoie cose, ’o tiempo e ’a quantità, accussì cagna ’a parola.
Ma ’sta lengua nosta, comme sempe ricimmo, e comme pure ricette “l’accademico lunatico Partenio Tosco” tene “varietà” e “particularità”. Vene a dicere ca è ricca ’e termine ca so’ tanto pricise, songo accussì apprupriate, accussì azzeccate e accussì azzeccuse, e tanto è ll’assurtimento d’ ’e pparole ca, a ssiconno d’ ’e ssituazione e d’ ’e circustanze, tene chella ca, ’a ssola, spieca meglio ’e nu sacco e na sporta ’e chiacchiere. E pe ce levà ’sta curiosità, arapite bbuono ’e rrecchie e ghiammo a vedé a Napule comme chiove.
Iusto quanno accummenciano a fa ddoie gocce d’acqua, na frezziatella, propio quann’ammenaccia ’e chiovere, tanno nuie ricimmo SCHEZZECHEA. ’Sta parola, ca nun se po’ traducere ’ntuscano, vene da schizzeco ca, rint’ ’a lengua nosta, signifeca sia “goccia” e sia “nu poco”. ’A parola tuscana ca chiù s’accosta è “pioviggina”. Ma pe tramente chesta vò ricere ca chiove fino fino, mo ccà mo llà, ’a nosta, mmece, vò dicere ca sta facenno appena appena quacche goccia d’acqua fina, mo sì, mo no.

Schezzechiava. ’O tiempo pareva fatto apposta
pe mme fa’ tutto, attuorno, cchiù scuro accumparé…

S. Di Giacono, Parole d’ammore scuntento

Ma quanno ’e ggocce se fanno nu poco cchiù grussicelle, allora, nuie ricimmo ca CHIOVELLECHEA, c’arrassumiglia a ’a parola tuscana c’avimmo ditto primma.

N. Stigliola, Eneide, XII, 151

Quanno l’acqua, mmece, se fa assaie ma resta fina fina, allora po’ ricimmo ca CERNOLEIA.Comme si passasse pe dint’a nu creviello, e, pe cchesto, ’sta parola vene da cèrnere, ca è l’azziona ca fa chi sparte ’o sciore r’ ’a farina r’ â vrenna pe mezzo r’ ’o setaccio, r’ ’o crivo a mano, ca meglio nuie ricimmo setella.

G. Quattromani, Ll’ode de Q. Arazio Fracco, III, 30

Ma quanno po’ ll’acqua scenne una continuazione, eguale, fitta fitta, pe tutte pizze, allora tanno CHIOVE: e pò cchiovere a llancelle, o pò cchiovere a ccampanelle, ma nun putarranno maie chiovere “passe e ficusecche”.

S. Di Giacomo, Marzo

E ancora:

R. Chiurazzi, ’O cavallo.

Ma quanno a principio d’ ’a staggiona, rint’ ’o mese ’e maggio, quann’ammaturano ’e ccerase e ’e crisommole, bell’e buono, a ll’antrasatta, se scatena a chiovere cu viento e tronole e lampe, e, accussì comm’è accumminciato, poco doppo fernesce, allora chella è na TRUBBEIA. Parola ca vene r’ ’o ggreco tropaia, ca significa viento ca va e ca vene, e d’ ’o llatino tropea ca era ’o nomme ’e nu viento ’e mare. Tant’è overo ca quanno ce sta nu cuntrasto, n’appicceco, e doie tre perzone s’acchiappano malamente ca nun se capisce ’a ro’ veneno ’e mazzate, propio comm’ ’o viento ca mbroglia tutt’ ’e ccose, se dice ch’è succieso na trubbeia. Perciò, quann’a maggio fa chellu cchiovere pesante nuie dicimmo: ’a trubbeia d’ ’e ccerase. E quanno, primm’ ’e chiovere, ’o tiempo se fa niro e lampe e tuone avvertono ca sta pe chiovere, ca è prossemo nu tempurale, tanno dicimmo: aria ’e trubbeia

R. Capozzoli, Don Chisciotte, III, XLIV

E ancora:

G. Capurro, E aspetto!

Ma quanno ll’acqua è assaie e chiove a cielo apierto, pe nu bellu ppoco, e pare ca nun fernesce cchiù, tanno DELLUVIA. Pecché arricorda chillo ca mannaie ’o Pateterno, pe quaranta notte e quaranta iuorne, affunnanno ’o munno, p’annià ’e peccature.

Sgruttendio, Tiorba, V, 1.

E ancora:

Aninimo, Lo guarracino.

E ancora:

R. Bracco, ’O mbrello.

Senza scurdarce li ditte antiche: I’ dico ca chiove, ma no ca delluvia, pe dicere ca na cosa è esaggerata. E Tené ’o delluvio ncuorpo, ca vene a dicere ca nu crestiano nun se sazzia maie.
E pe cunchurere, quanno a ’o delluvio s’aunisce ’o viento, ’e lampe e ’e ttronole, allora tanno se dice ca ZEFFONNA. Parola ca vene d’ ’o llatino subfundere, ma po’ signifecà assaie, abbunnanza: nu zeffunno ’e bene; scunquasso: è succieso nu zuffunno; abbisso: è ghiuto a zeffunno; ruvina: ’o iuoco m’ha mannato a zeffunno.

G. Panza, Settembre.

E ancora:

G. Attanasio, ’O diluvio.

E pe chiurere:

G. Quattromani, Ll’ode de Q. Arazio Fracco, I, 16.

Stateve bbuono, e… purtateve ’o mbrello!

Claudio Pennino